За нас

         Бирото за јавни набавки е формирано како орган во состав на Министерството за финансии и нема својство на правно лице. Тоа функционира како единствен централен орган без подрачни единици. Неговото формирање претставува важен момент во унапредувањето на системот на јавни набавки кој насекаде во светот е многу динамичен и постојано се менува. Токму оваа негова карактеристика, но и фактот што јавните набавки се битен сегмент од јавната потрошувачка во стопанството, ја наметна потребата од создавање на вакво тело кое на секојдневна основа ќе ја следи имплементацијата на Законот за јавни набавки и ќе дава насоки за подобрување на системот. Република Македонија не е единствена која има некој облик на агенција за јавни набавки. Општ тренд е земјите од Источна и Југоистична Европа да креираат вакви органи, вклучувајќи ги тука и новите земји-членки на ЕУ (Полска, Словачка и други), а тоа е препорака и на Светска банка и други меѓународни институции и организации кои имаат долга традиција на јавни набавки. Целиот опфат на надлежности на Бирото се регулирани со Законот за јавни набавки. Така, Бирото ги врши следниве работи:

• иницира предлози за донесување на законски и други акти од областа на јавните набавки до министерот за финансии;
• го следи и анализира спроведувањето на законот и другите прописи за јавни набавки, функционирањето на системот на јавните набавки и иницира промени за подобрување на системот на јавните набавки;
• дава мислења во врска со одредбите и примената на овој закон;
• обезбедува совети и дава помош на договорните органи и економските оператори;
• подготвува модели на стандардна тендерска документација и модели на стандардни формулари за постапките регулирани со овој закон;
• води единствена евиденција на договорите за јавни набавки и истата ја одржува и ажурира и ја прави достапна до јавноста преку својата веб страница;
• прибира, ги обработува и анализира податоците за јавни набавки и подготвува статистички извештаи;
• за констатираните неправилности од добиените известувања веднаш ги информира договорните органи, а по потреба и надлежните органи;
• утврдува минимални услови за професионалните квалификации за лицата кои вршат стручни работи за јавните набавки;
• организира и врши обука за едукација на службеници и на други стручни лица во врска со јавните набавки;
• управува и оперира со својата веб страница и Електронскиот систем за јавни набавки (во натамошниот текст: ЕСЈН);
• соработува со меѓународните институции и други странски субјекти за работите поврзани со развојот на системот на јавните набавки;
• остварува меѓународна соработка во врска со системот на јавните набавки и ја планира и ја координира странската техничка помош на полето на јавните набавки;
• поднесува годишен извештај до Владата за неговите активности во функционирањето на системот на јавните набавки;
• дава упатства и изготвува прирачници и коментари на правилата за јавни набавки и издава електронски билтен, и
• врши други работи утврдени со овој закон.